Bahagie rasanye ane bise kenal ame abang, mpo encang, encing, serta ame yang laennye nyang ade dimari bae nyang di grop betawi bocor atawe nyang di betawi laennye. Dari mari nyok sudah semestinye kite semuanye kudu mawas ame kudu inget bahwa kita ntu atu sodare, ga ada warna kulit atawe awak kite nyang ngebedain.
Komunitas suatu kalangan ntu terkadang dapet ngebuat idup kite jadi ade rasa solideritas jati kasih ame temen atawe ame yang laennye, akan tetapi nyok kite berangkat dan ngebangun rase pesodarean kite dengan berbagi kasih ame sayang tanpa adanye beda bahase atawe beda suku. Dimari Betawi Bocor berupaye dengan semaksimal mungkin mau berbagi cerite baik cerite sejarah tanah betawi atawe budaye bedawi atawe budaye nyang laennye, darimari juge komunitas eni pengen ngebentuk atawe ngejadiin dari pola idup nyang tadinye kite bersifat induvidualisme, kite ubah dengan gaya nyang dapet nyatuin dari setiap kalangan.
Nah darimari nenek moyang kite udeh nanemin pola-pola sikap idup yang tadinye kite engga mau peduli ame sodare, kite kudu ade rase cinte kite ame sodare kite nyang laennye. Tanpa basa-basi ibarat nasi ntu udeh jadi bubur nyang rasanye anta atawe anyep kite bumbuin ame campurin biar rasanye ntu rada enakan.
Kalu kite perhatiin waktu kite masih kecil atawe masih bocah kalu udeh masup pertengahan bulan rowah (Ramadhan) emak-emak kite dulu atawe sodare-sodare kite dulu sering jadiin bulan eni untuk nguatin atawe ngiketin rasa cinte ame rase peduli dari setiap tetangga nyang jauh atawe tetangga nyang deket. Singkatnye nih, pada waktu jaman dulu ntu biasanye kalu udeh malem mao tujuh likur atawe nyang kite kenal dalem agame ntu malem laillatul qhadar, nah biasenye emak kite atawe m’po kite bikin ketupat atawe masakan nyang laennye sekedar untuk ngenyambut akan datenggnye malem tujuh likur, akan tetapi masakan ntu die lebihin masakannye walaupun kuahnye aje nyang die banyakin, tapi masakan ntu die bagi-bagi ame tetangganye, atawe sodarenye nyang deket atawe nyang jaoh.
Dan tanpa kite sadarin atawe kite perhatiin emang agame udeh ngedidik atawe ngebentuk rase cinte dengan sodare nyang satu ame sodare nyang laennye, tetangga nyang satu ame tetangga nyang laennye. Bahkan nabi kite ntu udeh nanemin sifat budi pekerti saling bahu membahu atawe saling tolong menolong antara kite dengan nyang laennye.
Ade pepatah orang dulu nyang bilang “kalu kite tanemin sifat kikir atawe medit, atawe sifat kaga mao peduli ame sodare kite, maka rezeki ntu bisa jaoh ame kite”
Tidak ada komentar:
Posting Komentar