NASI PADANG PULISI

Unik emang kalu kite liat atawe perhatiin Jakarta semakin lama ntu semakin semeraut, belon lagi kalu kite liat jalanan semakin lame semakin penuh ame mubil, atawe motor. 

Nah kadang-kadang ntu ade juge nih nyang pegawe kantoran kalu berangkat pagi-pagi buta, belon lagi tukang asongan nyang jajahin dagangannye, akan tetapi ane bangga jadi warga Jakarta kalu liat abang, m’po, encing, encang pade  tunggang tungging usaha nyari duit buat ngebulin pendaringannye. 

Maklum usahe buat idup sementare di dunia. Alhamdulillah pada eni ari Betawi Bocor ngusahain bikin postingan liwat sentuhan alam maya, kalu kata orang-orang sekarang mah Internet. 

Nah dari sini ane ade sebuah kisah nyata nyang di alamin ame kawan ane kendiri, sebut aje Bang Urip, nyang kadang-kadang kalu pas libur die isi ari liburnye mancing di ancol, sekedar ngelepas rasa sumpek ngeliat jakarta semakin amburadul.

Nah pas ari minggunye bang urip siapin alat-alat buat mancingnye dari kenur, empan (pelet), ame perabotan nyang laennye. hatinye bang urip rasanye menggebu-gebu pengen liat laut ame dapetin ikan kakap, saking girangnye die tancep gas, maklum pagi-pagi belon begitu macet. 

Nah pas lampu merah die bablas aje sekalian, die kaga liat pulisi lagi ngejedok dideket pu’un beringin…..prittttt. nah apes dah guah “dalem ati bang urip” 

Pulisi : Maaf, selamat pagi pak.

Bang urip : selamat pagi juga pak…! “jawab bang urip”

Pulisi : kenapa bapak lampu merah tidak berhenti dahulu..!

Bang urip emang udah ngerasa salah dia mah diem aje, sembari ngelepas cantelan atawe iketan nyang diiket pake karet gelang, disetang motor sebelah kiri berisi empan buat mancing (pelet). 

Pulisi : mari bapak ikut saya ke pos.

Bang urip langsung ngikutin pulisi ntu kedalem pos jaganye, sembari nenteng empan ikan (pelet). Terus pelet ntu die taro diatas meja pulisi tersebut. Kebetulan diatas meja ntu ada kantong atawe bungkusan nyang sama ame bungkusan peletnye. 

Singkat cerite bang urip bisa nego ame pulisi tersebut die ngasih dua pulu lima ribu perak. Tanpa basa-basi die ngambil bungkusan nyang die taro diatas meja tersebut, pas sampai di ancol die keluarin jorannye (pancingan) sembari die buka bungkusan empan ikan (pelet), die malah ngakak ketawe kenderean. Ternyata die salah ambil bungkusan, nyang die bawa bungkusan makanan nasi padang punye pulisi.