Sebentar lagi kite ngadepin nyang namanye bulan puase atawe nyang orang betawi bilang ntu bulan rowah (ramadhan), dipertengahan bulan sya’ban eni pengurus Betawi Bocor mao ngucapin maaf, kalu ade salah atawe kata nyang udeh bikin ati rada dongkol, maklum dah namanye juge manusie terkadang kite bise aje khilaf.
Mumpung kite masih diberi kesempatan untuk dapetin ngehirup udaranye, ape salahnye kalu kite saling maaf, memafin kesalahan-kesalahan sodare kite. Nah oleh karena ntu sudah semestinye kite nyang ada di dunia batas maya eni terkadang kite mudah sekali tergesek oleh sebuah selisih faham, nyang nge-akibatin kite bise adu batin saling gondok-gondokan.
Nyok kite buka lebar-lebar celah batin di balik dade kite, songsong dan kite sambut bulan suci ntu dengan kebersamaan, bukan dengan ketiade samaan antara nyang satu ame nyang laennye. Bukan juge dengan warna rase suku nyang ngebedaain ntu semua, dan bukan pula dengan si kaye ame si miskin, si ganteng ame si jelek.
Akan tetapi kite nyang udeh ngaku-ngaku beragame islam sudah semestinye menepis ame ngejauhin sifat-sifat nyang dapet beradu gesekan batin antare satu ame nyang laennye, Alhamdulillah pade kesempatan eni ari nyok kite nge-gunain sisa-sisa umur kite untuk selalu nge-buka kata maaf dan memohon maaf ame orang nyang udeh kite sakitin, agar kelak kite dapet ngendusin baunye surge firdaus.
Oleh karena ntu sambutlah kedatengan bulan suci Ramadahan ntu dengan tiga hal :
1. Gunain akal kite bahwa kite semuanye nyang ada disini adalah sodare, tak ade bedanye suku nyang atu ame suku nyang laennye, melainkan kenyakinan (akidah), bahwa muslim ntu ibaratkan satu tubuh.
2. Hilangkanlah rasa egoisme di antara kite, nyang bise nyebapin hilangnye rase persodarean, serta dapet nimbulin rasa tamak (rakus/maruk) sehingga ngasih celah ame batin tidak mudah nge-ma’afin.
3. Berangkatlah dari niat kite nge-maafin atawe mema’afin dari ati kite nyang paling dalem, untuk nge-nyambut ame nge-jalanin puase agar kelak amal ibadah kite di terime, serta dapet ngendusin baunye aroma surge Firdaus.
Tidak ada komentar:
Posting Komentar